काठमाडौं ।
रुसी राष्ट्रपति भ्लादिमिर पुटिनले भारत र चीनप्रति अमेरिकाको दृष्टिकोणमाथि टिप्पणी गरेका छन्। उनले अमेरिकाले भारत र चीनलाई गरेको व्यवहार ठिक नभएको तर्क गरेका छन्। बुधबार चीनमा पत्रकारहरूसँग कुरा गर्दै पुटिनले भारत र चीनमाथि अमेरिकी दबाब बारेमा
भने ,’तपाईंसँग भारत जस्ता देशहरू छन्,जसको जनसंख्या लगभग १।५ अर्ब छ। चीन बलियो अर्थतन्त्र भएको देश हो। तर, यी देशहरूको आफ्नै घरेलु राजनीतिक संयन्त्रहरू छन्।’
उनले भने, ‘तपाईंले ती ठूला देशहरूको नेतृत्वको बारेमा सोच्नुपर्छ। यी देशहरूको इतिहास छ जहाँ उनीहरूले कठिन समय देखेका छन्। उनीहरूले लामो समयसम्म उपनिवेशवादको सामना गर्नुपरेको थियो। तपाईंले बुझ्नुपर्छ कि यदि तिनीहरूमध्ये कसैले कमजोरी देखायो भने,उनीहरूको राजनीतिक करियर समाप्त हुनेछ।’
पुटिनले थपे,’औपनिवेशिक युग अब सकिएको छ। तपाईंले बुझ्नुपर्छ कि तपाईं यी देशहरूसँग यसरी कुरा गर्न सक्नुहुन्न।’ हालै अमेरिकी राष्ट्रपति डोनाल्ड ट्रम्पले भारतमाथि ५० प्रतिशत कर लगाएका छन्।
भारतले रुसबाट ठूलो मात्रामा तेल किनेर यसमार्फत युक्रेन युद्धको लागि रुसलाई आर्थिक सहयोग गरिरहेको ट्रम्पको आरोप छ।
