वक्तव्यमा भनिएको छ, ‘हजारौँ युवाहरू विदेशी भूमिबाट रातो बाकसमा फर्किरहेका छन्, सयौं आमाबाबु सन्तानविहीन भएका छन्, कैयौँ बालबालिकाहरू टुहुरा भएका छन्। घुस नदिएर कुनै काम नहुने यो मुलुकमा न्याय मरेको छ, सुरक्षा निकाय भ्रष्टहरूको सेवक बनेका छन्।’
जेन–जी पुस्ताको विद्रोह केवल सरकार बदल्ने नभई सम्पूर्ण राजनीतिक व्यवस्था बदल्ने आन्दोलन भएको दाबी गरिएको छ। वक्तव्यमा भनिएको छ, ‘जनताले प्रत्यक्ष भोटमार्फत आफ्ना सरकार प्रमुख रोज्ने प्रणाली ल्याइनेछ, तीन दशकसम्म लुटिएको जनताको पैसा फिर्ता गराइनेछ र लुट गर्नेहरूलाई कालकोठरीमा हालिनेछ।’
त्यस्तै, विश्वविद्यालयदेखि न्यायालय, कूटनीतिक निकायदेखि कर्मचारीतन्त्रसम्मलाई पुनःसंरचना गरेर जनताको पक्षमा उन्मुख गरिने योजना पनि सार्वजनिक गरिएको छ। उनीहरूले योग्य, इमान्दार र निष्ठापूर्वक काम गर्ने व्यक्तिहरूलाई अवरोध नभई अवसर दिने वातावरण निर्माण गर्ने प्रतिबद्धता गरेका छन्।
विद्रोहको मूल लक्ष्य नेपालको सम्पूर्ण ध्यान विकास र तीव्र आर्थिक वृद्धिमा केन्द्रित गराएर केही दशकभित्रै नेपाललाई विश्वका उन्नत राष्ट्रहरूको पंक्तिमा उभ्याउने रहेको उल्लेख छ।
जेन–जी पुस्ताको तर्फबाट रवि किरण हमालले पत्रकार सम्मेलनमा भने, ‘अब हामी चुप बस्दैनौँ! अब हामी डराउँदैनौँ! अब हामी झुक्दैनौँ! अब हामी उठ्छौँ! भाद्र २३ गते जनताको ज्वालामुखी सडकमा फुट्नेछ।’
