क्रिश्चियन पुलिसिकको उत्कृष्ट प्रदर्शनमा एसी मिलानले इटालियन सिरी ‘ए’मा सोमबार टोरिनोविरुद्ध ३–२ को रोमाञ्चक पुनरागमन जित दर्ता गरेको छ । मिलानले दुई गोललेपछि परेको स्थितिलाई उल्टाउँदै खेल आफ्नो पक्षमा पारेको हो ।
ओलिम्पिको डी टोरिनोमा पाहुना टोली मिलानलाई जित दिलाउन पुलिसिकले दुई र एड्रियन राबियोटले एक गोल गरे । टोरिनोका लागि निकोला भ्लासिक र डुभान जापाटाले गोल गरे ।
खेलको १०औँ मिनेटमा भ्लासिकले पेनाल्टीमार्फत गोल गर्दै टोरिनोलाई अग्रता दिलाएका थिए । सात मिनेटपछि नै जापाटाले टोलीको अग्रता दोब्बर बनाए ।
राबियोटले २४औँ मिनेटमा गोल गर्दा खेल २–१ को स्थितिमा पुग्यो । ६७औँ मिनेटमा पुलिसिकले खेललाई २–२ को बराबरीमा ल्याए । त्यसको १० मिनेटपछि पुलिसिकले व्यक्तिगत दोस्रो गोल गर्दै टोलीलाई पुनरागमन जित दिलाए ।
जितसँगै १४ खेलमा ३१ अंक जोडेको मिलान शीर्ष स्थानमा उकिलएको छ । पराजित टोरिनो समान खेलबाट १४ अंकका साथ १६औँ स्थानमा छ ।
