वैखरी अनलाइन, कपिलवस्तु।
कपिलवस्तु उद्योग वाणिज्य संघले रसुवासहित विभिन्न क्षेत्रमा आएको विनाशकारी बाढी तथा पहिरोबाट प्रभावित नागरिकहरूको उद्धार, राहत र पुनर्स्थापनाका लागि एकजुट भएर सहयोग गर्न उद्योगी, व्यवसायी तथा सर्वसाधारणसँग अपिल गरेको छ।
संघका अध्यक्ष गणेशबहादुर क्षेत्रीद्वारा जारी विज्ञप्तिमा विपद्मा ज्यान गुमाएकाप्रति भावपूर्ण श्रद्धाञ्जली व्यक्त गर्दै घाइतेहरूको शीघ्र स्वास्थ्यलाभ र सम्पर्कविहीन नागरिकहरूको सकुशल उद्धारको कामना गरिएको छ।
विज्ञप्तिअनुसार बाढी र पहिरोका कारण सयौँ नागरिकको ज्यान गएको, कैयौँ अझै सम्पर्कविहीन रहेको तथा घर, सडक, पुल, सवारीसाधन, व्यापारिक प्रतिष्ठान र अन्य भौतिक संरचनामा ठूलो क्षति पुगेको उल्लेख गरिएको छ। विशेषगरी रसुवागढी भन्सार क्षेत्र र सीमा व्यापारमा समेत गम्भीर असर परेको संघले जनाएको छ।
कपिलवस्तु उद्योग वाणिज्य संघले आफ्ना सदस्य उद्योगी–व्यवसायीलाई राहत संकलन, समन्वय र सहयोग अभियानमा सक्रिय रूपमा सहभागी हुन आग्रह गर्दै आवश्यक परेको अवस्थामा संघबाट पनि आवश्यक सहयोग र सहकार्य गर्ने प्रतिबद्धता व्यक्त गरेको छ।
देशभरका विभिन्न निजी क्षेत्रका संस्थाहरूले समेत बाढीपीडितको उद्धार, राहत र पुनर्स्थापनाका लागि सहयोग अभियानमा सहभागी हुन अपिल गरिरहेका छन्।
