कञ्चनपुर – कञ्चनपुरमा रक्सी सेवन गरेर बुवाले छोराको हत्या गरेका छन् ।
भिमदत्त नगरपालिका-२ उल्टाखामका डम्मर चन्दले बुधबार राति अत्याधिक रक्सी पिएर कैँची प्रहार गरी १३ वर्षीय छोरा सुवर्ण चन्दको हत्या गरेका हुन् ।
अत्याधिक रक्सी सेवन गरेका चन्दले भान्सामा पिठो मुछिरहेका छोरालाई चिन्न नसक्दा घाँटीमा कैँचीले प्रहार गरेको स्थानीयको भनाइ छ ।
हत्यापछि स्थानीयले जाँड-रक्सी बन्द गर्न माग गरेका छन् । उनीहरुले स्थानीय प्रशासनको लापर्बाहीका कारण जाँड-रक्सीको बेचबिखनमा नियन्त्रण नआएको र अपराधिक घटना बढ्दै गएको आरोप समेत लगाएका छन् ।
यस्तै जनप्रतिनिधि घटनास्थलमा नगएको भन्दै स्थानीयले भिमदत्त नगरपालिका-२ को वडा कार्यालय घेराउ गरेका छन् । भिमदत्त नगरपालिका-२ को वडा कार्यालयले गएकाे वर्ष नै आफ्नो वडालाई मदिरा निषेधित क्षेत्र घोषणा गरेको थियो । तर यो घोषणामै सीमित भएको छ ।
