Month: April 2021

पर्साको कालिकामाई गाउँपालिकाका अध्यक्ष नथुनीप्रसाद कुशवाहको आज बिहान निधन भएको छ । पाँच दिनदेखि उच्च ज्वरो, श्वासप्रश्वासमा समस्या जस्ता रोगबाट ग्रसित ८१ वर्षीय कुशवाहको बिहान २ बजे वीरगञ्ज– ९ स्थित आफ्नै निवासमा निधन भएको हो ।

कोरोनाको बढ्दो सङ्क्रमणका कारण घरमै उपचार गराइरहेका कुशवाहलाई कोरोनाको लक्षण देखिए पनि पीसीआर परीक्षण नभएको पारिवारिक स्रोतले जनाएको छ ।

कुशवाहको शव अन्तिम संस्कारका लागि कालिकामाई– २, भेडिहारीस्थित निवासमा बिहानै लगिएको उनका छोरा इन्दुभूषणले जानकारी दिए ।

कुशवाह सङ्घीय समाजवादी पार्टीबाट गाउँपालिका अध्यक्षमा निर्वाचित भएका थिए ।

नेकपा माओवादी केन्द्र कर्णाली प्रदेशसभाका सांसदहरूले आधा महिनाको तलब कोरोना महामारीविरुद्धको प्रतिकार्यका लागि प्रदेश विपद् कोषमा जम्मा गर्ने भएका छन् ।

माओवादी केन्द्र संसदीय दलको बैठकले आधा महिनाको तलब कोरोना महामारीविरुद्धको प्रतिकार्यका लागि प्रदेश विपद् कोषमा जम्मा गर्ने निर्णय गरेको संसदीय दलकी प्रमुख सचेतक सीता नेपालीले जानकारी दिइन् ।

‘देश महामारीले आक्रान्त भएका बेला सबै नागरिक सचेत र सहज हुनुपर्ने बेला आएको छ,’ उनले भनिन्, ‘त्यसलाई प्रभावकारी प्रतिकार्य योजना बनाउन हामीले आधा महिनाको तलब विपद् कोषमा जम्मा गर्ने निर्णय गरेका हौं ।’

बैठकले कोरोनाविरुद्धका प्रतिकार्यलाई सशक्त बनाउन माओवादी केन्द्रका सांसदहरूले आफ्नो निर्वाचन क्षेत्रका प्रदेश सरकार मातहतका निकाय, स्थानीय तह, स्वास्थ्य संस्था तथा नागरिक संघसंस्थासँग आवश्यक समन्वय तथा अनुगमन गर्ने निर्णय पनि गरेको प्रमुख सचेतक नेपालीले बताइन् ।

रुपन्देहीको लुम्बिनी प्रादेशिक अस्पतालमा आईसीयू बेड नपाएर एक जना कोरोना संक्रमित पुरुषको मृत्यु भएको छ ।

बुटवल उपमहानगरपालिका–११ का ८३ वर्षीय पुरुषको आईसीयू बेड नपाएर अस्पतालको आकस्मिक कक्षमै मृत्यु भएको हो । २४ घण्टासम्म आकस्मिक कक्षमा राखेर उपचार गरिएका उनले अन्तिम समयसम्म पनि आईसीयू बेड पाएनन् ।

१६ वैशाखमा कोरोना पुष्टि भएपछि उनी उपचारका लागि लुम्बिनी प्रादेशिक अस्पताल भर्ना भएका थिए । लुम्बिनी प्रादेशिक अस्पतालका प्रवक्ता डा. विष्णु गौतमले आईसीयू बेड अभाव भएकाले आकस्मिक कक्षमै ती पुरुषको शुक्रबार बिहान ९ बजे २८ मिनेटमा मृत्यु भएको बताए ।

कोरोना संक्रमितको चाप बढेपछि हाल फिबर क्लिनिकसहित इमर्जेन्सीमा समेत कोरोना संक्रमितलाई राखेर उपचार थालिएको उनले बताए ।

यसअघि पनि लुम्बिनी प्रादेशिक अस्पतालमा अक्सिजन बेड नपाएर देवदह नगरपालिकाकी  एक महिलाको फिवर क्लिनिकमा मृत्यु भएको थियो ।

किरणमान बज्राचार्य, कपिलवस्तु बैशाख १७
प्रादेशिक अस्पतालमा बुटवलमा बेड अभावका कारण उपचार हुन नसेकेकी एक कोरोना संक्रमित गर्भवति महिलाको कपिलस्तु अस्पतालमा अप्रेशन गरी बिहीवार राति बच्चा जन्माइएको छ । प्युठान स्थायी घर भएकी ३१ बर्षिया महिला उपचारकालागि सोमबार प्रादेशकि अस्पताल बुटवल लगएकी थिईन । गर्भवति समेत रहेकी ती महिलाको पिसिआर टेस्ट गर्दा पोजेटिभ देखिएको थियो । बच्चा जन्माउन बुटवल अस्पताल पुगेकी उनी चार दिन अघि कोरोना पोजेटिभ देखिएकी थिईन । ३ बर्ष अघि पनि बुटवल अस्पतालमै अप्रेशनबाट छोरा जन्माएकी ती महिलालाई चार दिन सम्म आईसोलेशनमा राखिएको थियो । पेटमा पीडा भए पछि बेड अभावले उनको त्यहा उपचार हुन सकेको थिएन । भीम अस्पताल भैरहवामा समते बेड अभाव थियो ।

प्रोदशिक अस्पतालका डाक्टरहरुले कपिलवस्तु अस्पतालमा ती महिलाको उपचारकालागि रिफर गरेका थिए । ‘ बेड अभावले कोरोना संक्रमित गर्भवति महिलाको उपचार गर्न कपिलवस्तु अस्पताल पठाइएको थियो ’ अस्पतालका मेसु किशोर बन्जाडेले भने ‘ काम चुनौतीपुर्ण थियो, तर सफल भयौ ’ । टीमको प्रयासले हामी सफल भयौ उनले भने । राति नौ बजेर ५७ मिनेटमा ती महिलाको अप्रेशन गरी ३ किलो २४० ग्रामको बच्चा जन्माइएको अस्पतालका डाक्टर गणेश क्षेत्रीले बताए । ती महिलाको २ वटा बच्चा खेर गइस्केको थियो ।

‘ प्रसुति पीडा भएको बेला कोरोना संक्रमित भए पछि ती महिलाको उपचार चुनौतीपुर्ण थियो, तर हामीले उनको सफल उपचार गर्यौ ’उनले भने । महिला र बच्चालाई अस्पतालमा छुट्टा छुट्टै राखिएको छ । बच्चाको पिसिआर टेस्टकालागि पठाइएको छ । आमा र बच्चाको अवस्था ठीक रहेको डाक्टर क्षेत्रीले बताए । कपिलवस्तु अस्पतालका वरिष्ठ मेडिकल सुपरिटेन्डेन्ट डा किशोर बन्जाडे, डा पुनम लामा, डा गणेश क्षेत्री, एनेस्थेसिया सहायक रमेश कुमार महतो, नर्सिङ कर्मचारी रबिना क्षेत्री, आयुष्मा अर्याल तथा सहयोगी सकरुन निशा लगायतका टोली अप्रेशनमा सहभागी थिए ।

कपिलवस्तु : कपिलवस्तुमा कोरोनाका कारण बिहिबार एकैदिन ५ जनाको मृत्यु भएको छ । मृत्यु हुनेमा वाणगंगा १०का ४६ बर्षिय एक पुरुष , विजयनगर ४ की ६० वर्षिया एक महिला र शिबराज नगरपालिका १ शिबपुर स्वास्थ्य चौकीमा कार्यरत ३४ बर्षिय पुरुष रहेको जनाईएको छ ।

त्यस्तै शिवराज नगरपालिका वडा नम्बर ३ निवासी ७० वर्ष को पुरुष र कपिलस्तु नगरपालिका वडा नम्बर ३ बस्ने ८८ वर्ष को पुरुषको ज्यान गएको छ ।

यो संगै कपिलवस्तु जिल्लामा मात्र मृत्युको संख्या ४३ पुगेको छ । यस्तै बिहिबार थप १८ जना संक्रमित थपिएका छन । जिल्लाभर अहिले सम्म कुल संक्रमितको संख्या २४१८ पुगेको कोरोना फोकल प्रशन उमेश घिमिरेले जानकारी दिनुभयो ।

काठमाडौं : निर्वाचन आयोगले बागमती प्रदेशको रिक्त राष्ट्रिय सभा सदस्य उपनिर्वाचनका लागि पाँच दललाई दर्ता गरी निर्वाचन चिह्न निर्धारण गरेको छ । आयोगका प्रवक्ता राजकुमार श्रेष्ठले बिहीबार प्रेस विज्ञप्ति जारी गरी उपनिर्वाचन प्रयोजनका लागि दल दर्ता हुन आएका नेमकिपा, एमाले, कांग्रेस, राप्रपा र माओवादी केन्द्रले उपनिर्वाचनका लागि दल दर्ता गरेको र उनीहरूलाई निर्वाचन चिह्न प्रदान गर्ने निर्णय भएको जानकारी दिएका हुन् ।

श्रेष्ठका अनुसार एमालेलाई सूर्य चिह्न क्रम १, कांग्रेसलाई रूख चिह्न क्रम २, माओवादी केन्द्रलाई गोलाकारभित्र हँसिया हथौडा क्रम ३, राप्रपालाई हलो चिह्न क्रम ४ र नेमकिपालाई मादल चिह्न क्रम ५ मा मतपत्रमा समावेश गर्ने निर्णय भएको छ ।

उपनिर्वाचनका लागि प्रदेश सभा सदस्य ११०, गाउँपालिका अध्यक्ष, उपाध्यक्ष, नगरपालिकाका प्रमुख, उपप्रमुख २३८ गरी ३४८ मतदाताको नाम समावेश गरी तयार पारिएको मतदाता नामावली स्वीकृत गर्ने र स्वीकृत भएको नामावली २१ वैशाखको बिहान ११ बजे निर्वाचन अधिकृतको कार्यालय हेटौँडामा प्रकाशन गर्ने निर्णय पनि गरेको छ ।

प्रकाशित नामावलीमा सोही दिनको बिहान ११ बजेदेखि साँझ ५ बजेसम्म नाम समावेश हुन छुटेको व्यक्तिले आफ्नो नाम समावेश गर्न दरखास्त दिने, मतदाता नामावलीमा नाम समावेश भएको व्यक्तिले नाम, थर, उमेर, पद आदि विवरण सच्याउने दरखास्त दिने, मतदाता नामावलीमा उल्लिखित मतदाताको विरोधमा उजुरी दिन सकिने व्यवस्था गरिएको विज्ञप्तिमा उल्लेख छ ।

रुपन्देही : लुम्बिनी प्रदेशमा जनता समाजवादी पार्टी (जसपा) का चार सांसद पदमुक्त भएका छन् । प्रदेश सभा सचिवालयले बिहीवार सूचना निकालेर सन्तोषकुमार पाण्डेय, विजयकुमार यादव, सुमन शर्मा रायमाझी र कल्पना पाण्डे पदमुक्त भएको जानकारी गराएको हो ।

सन्तोषकुमार रुपन्देही क्षेत्र नम्बर ३ ९१० र विजयकुमार यादव बाँके क्षेत्र नम्बर ९९१० बाट प्रत्यक्ष निर्वाचित हुन् भने रायमाझी र पाण्डे समानुपातिक सांसद हुन् । उनीहरू चारै जना केही दिनअघि मात्रै लुम्बिनी प्रदेश सरकारमा मन्त्री बनेका थिए ।

प्रदेशका मुख्यमन्त्री शङ्कर पोखरेलले आफैँविरुद्ध अविश्वासको प्रस्तावमा हस्ताक्षर गरेका जनता समाजवादी पार्टी ९जसपा० का तीन सांसदसहित चार जनालाई मन्त्री बनाउनुभएको थियो । पाण्डेबाहेक तीनैजनाले मुख्यमन्त्री पोखरेलविरुद्ध अविश्वासको प्रस्तावमा हस्ताक्षर गरेका थिए ।

मुख्यमन्त्री शङ्कर पोखरेलविरुद्ध अविश्वासको प्रस्ताव दर्ता भएको केही घण्टामै उनीहरूले लुम्बिनी प्रदेशको मन्त्री बनेर शपथ ग्रहण गरेका थिए ।

वैखरी अनलाइन
कपिलवस्तु जिल्लाको बाणगंगा नगरपालिमा कोरोना संक्रमितको लागी १५ सैयाको बेड अक्सीजन सहित तयार भएको छ । सिद्धार्थ क्याम्पसको सभा हलमा अक्सीजन सहितको १५ सैया बेड तयार गरिइएको हो ।

नगरभित्र कोरोना संक्रमित भई हालेमा र अक्सीजन चाइएमा सो को ब्यवस्थाका लागी आज अक्सीजनसहितको १५ सैयाको बेड तयार गरि सकेको बाणगंगा नगरपालिकाका प्रमुख मगंल प्रसाद थारुले वैखरी अनलाइनलाई बताए । अक्सीजन अभाव हुन नदिन र संक्रमितको उपचारमा कमी हुन नदिन नगरपालिका लागी रहेको उनले बताए ।

यसैबिच नगरभित्र पिसिआर रिर्पोट तत्काल निकाल्नका लागी तयारी भएको नगरपालिकाका उप प्रमुख चक्र अर्यालले बताए । साथै उनले थप आइसोलेशन निमार्णका लागी तयारी भई रहेको समेत बताए ।

वैखरी अनलाईन (कपिलवस्तु) : कपिलवस्तुका एमाले नेता कृष्ण पौडेल मोटरसाईकल दुर्घटनामा परी घाईते भएका छन् । सुकुमवासी समस्या समाधान आयोगका जिल्ला अध्यक्ष समेत रहेका पौडेल सोही कामका लागी तौलिहवा गएको समयमा उनको मोटरसाईकल अनियन्त्रित भएर दुर्घटना भएको हो ।

घाईते पौडेलको छात्तीका २ ओटा करङ भाचिएको जिल्ला प्रहरी कार्यलय कपिलवस्तुले जनाएको छ । उनलाई थप उपचारका लागी हेलिकप्टर मार्फत काठमाडौ लैजाने तयारी भईरहेको छ ।

काठमाडौं : यातायात व्यवस्था विभागले आजबाट सवारीचालक अनुमतिपत्रको अनलाइन आवेदन प्रणाली बन्द गरेको छ । विभागले सूचना जारी गर्दै अर्को सूचना प्रकाशन नभएसम्मका लागि हाल सेवा स्थगन गरिएको जनाएको छ ।

विश्वभरि फैलिँदै गइरहेको नयाँ भेरियन्टको कोभिड– १९ का कारण सरकारले निषेधाज्ञा जारी गरेकै दिनबाट विभागले तत्कालका लागि सेवा स्थगन गरेको हो । विभागले गत वर्ष चैतमा सरकारले बन्दाबन्दी जारी गरेदेखि गत पुससम्म सेवा अवरुद्ध गरेको थियो ।

गत असारमा बन्दाबन्दी खुकुलो बनाएसँगै नवीकरण र छापिसकेका अनुमतिपत्र वितरण जारी राखे पनि नयाँ अनुमतिपत्र छपाइ रोकेको थियो । अहिले पनि विभागले झन्डै पाँच लाख अनुमतिपत्र छाप्न बाँकी छ ।

काठमाडौं :मौसममा आएको परिवर्तनसँगै काठमाडौं उपत्यकासहित आसपासका पहाडी भोगमा अहिले मेघगर्जनसहित पानी परिरहेको छ। बिहीबार बिहान खुलेको मौसम मध्यान्हपछि बदली हुँदै गएकोमा दिउँसो २ बजेदेखि पानी पर्न थालेको हो।

काठमाडौंसहित देशका पहाडी भूभागका थोरै स्थान र तराईका एक–दुई स्थानहरुमा मेघगर्जन, चट्याङसहित पानी परिरहेको जल तथा मौसम विज्ञान विभागको मौसम पूर्वानुमान महाशाखाले जनाएको छ।

पश्चिमी वायु र स्थानीय वायुको प्रभाव रहेकोले राति पनि देशका पहाडी भूभागका एक–दुई स्थानमा मेघगर्जन,चट्याङ्ग, हावाहुरीसहित क्षणिक वर्षाको सम्भावना रहेको महाशाखाको मौसमविद् मिन कुमार अर्यालले जानकारी दिए।

उनका अनुसार शुक्रबार र शनिबार पनि स्थानीय र पश्चिमी वायुका कारण अपराह्नपछि मेघगर्जनसहित पानी पर्ने अनुमान गरिएको छ।

बर्दिया : प्रहरीले बर्दियामा विभिन्न मुद्दाका दुई फरार प्रतिवादीलाई पक्राउ गरी अदालतमा बुझाएको छ । जिल्ला प्रहरी कार्यालय बर्दियाका अनुसार २०७६ फागुन ७ गते जिल्ला अदालतको फैसलाले घरेलु हिंसा मुद्दामा जरिवाना तोकिइ फरार रहेका बर्दिया, बढैयाताल निवासी रामलाल थारुलाई बिहीबार पक्राउ गरिएको हो ।

३५ वर्षीय थारुलाई इलाका प्रहरी कार्यालय मैनापोखरको टोलीले नियन्त्रणमा लिइ जिल्ला अदालत गुलरियामा बुझाइएको जिल्ला प्रहरी कार्यालय बर्दियाले जनाएको छ ।

यस्तै, जिल्ला अदालतको २०७० असार २३ गतेको फैसलाले जारी मुद्दामा जरिवाना तोकिइ फरार रहेका बढैयाताल निवासी ४६ वर्षीय जयबहादुर थारुलाई पनि प्रहरीले बिहीबार नै पक्राउ गरेको छ । उनलाई पनि जिल्ला अदालतमा बुझाइएको प्रहरीले जानकारी दिएको छ ।

काठमाडौँ : कोरोना संक्रमणका कारण थापाथलीस्थित नर्भिक अन्तर्राष्ट्रिय अस्पतालमा उपचाररत पूर्वरानी कोमल शाहको स्वास्थ्य अवस्था गम्भीर भएपछि उनलाई आईसीयूमा सारिएको छ । शाहको शरीरमा अक्सिजनको मात्रा निकै कम देखिएपछि आईसीयूमा सारिएको अस्पताल प्रशासनले जनाएको छ ।

बिहीबार विज्ञप्ति सार्वजनिक गर्दै अस्पतालले श्वासप्रश्वासको समस्या देखिएको र अक्सिजनको समेत कमी देखिएपछि आईसीयूमा सारिएको जनाएको छ । ‘अहिले उहाँलाई हाई फ्लो अक्सिजनको सपोर्टमा राखिएको छ । बाँकी स्वास्थ्य समस्या देखिएको छैन,’विज्ञप्तिमा भनिएको छ ।

अस्पताल उच्च स्रोतका अनुसार पूर्वरानी शाहलाई अस्पताल पुर्‍याएदेखि नै अक्सिजनको कमीका कारण धेरै मात्रामा अक्सिजन दिएर राखिएको थियो । अहिले भने हाईफ्लो अक्सिजनको आवश्यकता परेका कारण आईसीयूमा सारिएको हो । ‘उहाँको अवस्था निकै गम्भीर छ । यस्तै अवस्था रहे कुनै पनि समय भेन्टिलेटरमा राख्नुपर्ने हुन सक्छ,’स्रोतले भन्यो, ‘पूर्वराजालाई भने अहिले सामान्य अक्सिजन सपोर्ट मात्रै चाहिएको छ ।’

अस्पतालमै उपचाररत पूर्वराजा ज्ञानेन्द्र शाहको अवस्था भने सामान्य र स्थिर रहेको विज्ञप्तिमा उल्लेख छ । उनी पनि हाल अक्सिजनकै सामान्य सपोर्टमा रहेको विज्ञप्तिमा उल्लेख छ । पूर्वअधिराजकुमारी प्रेरणाको अवस्था भने सामान्य भएकाले अक्सिजनको सपोर्ट दिनु नपरेको बताइएको छ ।

कोरोना संक्रमणपछि पूर्वराजा ज्ञानेन्द्र , पूर्वरानी कोमल र पूर्वअधिराजकुमारी प्रेरणा शाह गत वैशाख ११ गते नर्भिक अस्पताल भर्ना भएका थिए ।

केही दिनअघि पूर्वराजा ज्ञानेन्द्र दम्पती भारतको हरिद्वारमा आयोजित कुम्भमेलामा सहभागी भएर वैशाख ५ गते नेपाल फर्किएका थिए । ज्ञानेन्द्र उत्तराखण्डको हरिद्वारमा भएको शाही स्नानमा सहभागी भएका थिए । हरिद्वारको कुम्भमेलामा सहभागी भएका सयौंलाई यसअघि नै कोरोना पुष्टि भएको छ ।

काठमाडौं : काठमाडौं महानगरपालिका-१४ कलंकीमा मोटरसाइकल दुर्घटना हुँदा एक जनाको मृत्यु भएको छ। बुधबार राति मोटरसाइकल दुर्घटना हुँदा कीर्तिपुर नगरपालिका-१ बाघभैरव बस्ने ५० वर्षीय राजमान महर्जनको मृत्यु भएको हो।

उनको बा.६१ प १५३६ नम्बरको मोटरसाइकल आफैं अनियन्त्रित भई दुर्घटना भएको हो। दुर्घटनामा गम्भीर घाइते भएका उनको नेपाल नेसनल अस्पतालमा उपचारको क्रममा मृत्यु भएको हो।

बुटवल : रुपन्देहीको सैनामैना नगरपालिकाले कोरोना विशेष अस्थायी अस्पताल सञ्चालनमा ल्याएको छ । सैनामैना–१ वनकट्टामा रहेको पदमपाणि योग तथा प्राकृतिक चिकित्सालयको भवनमा कोभिड अस्पताल सञ्चालनमा ल्याइएको हो ।

अस्पतालमा हाल तीनवटा मोनिटरयुक्त बेड, पाँचवटा अक्सिजनयुक्त बेड र ४५ वटा आइसोलेसन बेड रहेका छन् । अस्पतालमा अक्सिजन सिलिण्डर थप भएमा ५० बेडमै लक्षणसहितका संक्रमितलाई उपचार गर्न सकिने नगरपालिकाका स्वास्थ्य शाखा प्रमुख हेमराज पन्थीले जानकारी दिए ।

अस्पतालमा एकजना विशेषज्ञ डाक्टर, एकजना हेल्थ असिस्टेन्ट, दुईजना स्टाफ नर्स, चारजना अनमी र एकजना अहेब कार्यरत छन् । नगरपालिकाका प्रमुख चित्रबहादुर कार्कीले लुम्बिनी प्रादेशिक अस्पताल र भीम अस्पताल भैरहवामा बेड अपुग भएर संक्रमितले उपचार नपाइरहेको अवस्था देखेर प्राकृतिक चिकित्सालयमा कोरोना विशेष अस्पताल सञ्चालन गरिएको बताए । उनले प्रदेश सरकारले तत्काल ३० थान अक्सिजन सिलिण्डर, एक्सरे मेसिन र मोनिटर उपलब्ध गराएको खण्डमा संक्रमितले सहजरुपमा उपचार पाउने र उनीहरुको जीवन जोगिने बताए ।

संघीय सरकारबाट प्राप्त ५० लाख रुपैयाँ बजेट चालु आर्थिक वर्षभित्र कोरोना संक्रमितको उपचार, संक्रमण रोकथाम र नियन्त्रणमा खर्च गरिने उनले बताए । अस्पतालको उद्घाटन गर्दै प्रदेशसभा सदस्य भूमिश्वर ढकाल, प्रमुख जिल्ला अधिकारी अस्मान तामाङ र जिल्ला स्वास्थ्य कार्यालय रुपन्देहीका प्रमुख डा। राजेन्द्र गिरीले गत वर्षको भन्दा यसपटकको कोरोना भाइरस संक्रमण दर उच्च रहेकाले सबै उमेर समूहको स्वास्थ्यमा जटिलता निम्ताउने र मृत्यु दर पनि बढी भएकाले स्वास्थ्य सतर्कता अपनाउन र निषेधाज्ञाको पूर्ण पालना गर्न आग्रह गरे ।

अस्पताल उद्घाटन भएकै दिन एकजना जटिल स्वास्थ्य अवस्थाका र दुईजना सामान्य अवस्थाका संक्रमित भर्ना भएर उपचार लिन शुरु गरेको डा। विमल शर्माले बताए ।

काठमाडौं : पछिल्लो १४ घण्टामा बाँकेमा कोरोना संक्रमणबाट १० जनाको मृत्यु भएको छ । बुधबार राति ८ः५५ बजेदेखि बिहीबार बिहान ८ बजेसम्म ८ जनाको मृत्यु भएको थियो ।

बिहीबार बिहान पुनः आधा घण्टाको फरकमा थप दुई जनाको मृत्यु भएसँगै पछिल्लो १४ घण्टामा कोरोना संक्रमणबाट बाँकेमा १० जनाको मृत्यु भएको हो ।

बाँकेका कोरोना फोकल पर्सन तेज ओलीका अनुसार भेरी अस्पतालमा कैलालीको टिकापुर नगरपालिका–१ की ५२ वर्षीया महिला र नेपालगञ्ज मेडिकल कलेज शिक्षण अस्पताल कोहलपुरमा बाँकेको नेपालगञ्ज–८ का ३३ वर्षीय पुरुषको आधा घण्टाको फरकमा मृत्यु भएको हो ।

कैलालीकी ५१ वर्षीया महिलाको बिहीबार बिहान १० बजे भेरी अस्पतालमा मृत्यु भएको हो भने नेपालगञ्ज–८ का ३३ वर्षीय पुरुषको नेपालगञ्ज मेडिकल कलेजमा बिहीबार बिहान १०ः३० बजे मृत्यु भएको ओलीले बताए । महिलामा वैशाख १४ गते गरिएको परीक्षणमा संक्रमण पुष्टि भएको थियो ।

३३ वर्षीय पुरुषको वैशाख १३ गते गरिएको परीक्षणमा रिपोर्ट पोजेटिभ आएको थियो भने त्यसको दुई उनलाई अस्पताल भर्ना गरिएको थियो ।

कपिलवस्तुको बाणगंगा नगरपालिकामा कोरोनाका कारण थप एक जनाको मृत्यु भएको छ । वडा नम्बर ४ जितपुरको कपिलवस्तु सामुदायिक अस्पताल नजिकै घर भएका ४५ बर्षीय पुरुषको उपचारको क्रममा काठमाण्डौँमा ज्यान गएको हो । यस खबरलाई स्वास्थ्य कार्यालयले पुष्टि गर्न बाँकी छ ।भारतको गुजरातबाट घर आएका उनलाई सुरुमा ज्वरो आएको थियो । त्यसपछि परीक्षण गर्दा कोरोना देखिएपछि भैरहवा लगिएको बताइएको छ ।

श्वास फेर्न बढी समस्या भएपछि क्रिमसन अस्पतालबाट उनलाई काठमाण्डौँ रिफर गरेपछि बुटवलबाट हेलिकप्टर चार्टर गरी काठमाण्डौँ लगिएकोमा गयराति ज्यान गएको आफन्तले  बताएका छन् । उनी भारतमा राम्रै कम्पनीमा काम गर्थे । उहाँ घर नपसी सिधै अस्पताल गएको आफन्तले बताए ।

कोरोनाको दोश्रो लहरको भेरियन्ट संक्रमणका कारण बाणगंगामा ज्यान जानेको संख्या ४ पुगेको छ । यहाँ हिजोमात्र ५ जना नयाँ संक्रमित थपिएका थिए । यस्तै जिल्लामा अहिलेसम्म ३९ जनाको कोरोनाको कारण ज्यान गैसकेको छ ।

रुपन्देहीमा आज बिहान ६ बजेदेखि निषेधाज्ञा लागेको छ ।  प्रमुख जिल्ला अधिकारीले बुधबार नै  जारी गरेआदेश अनुसार अत्यावश्यक बाहेकका सबै सेवा सञ्चालनमा रोक लगाइएको छ ।

सूचनाअनुसार वैशाख १६ गते बिहान ६ बजेदेखि ३० गते बिहान ६ बजेसम्म निषेधाज्ञा जारी गरिएको छ ।

अत्यावश्यक अन्तर्गत खाद्य सामग्रीको पसल खुला हुनेछ । सरकारी कार्यालय, बैंक तथा वित्तीय संस्था र अरु अत्यावश्यक सेवा दिने कार्यालय सञ्चालन हुनेछ । सरकारी कर्मचारी, बैंक तथा वित्तीय संस्था र अरु अत्यावश्यक सेवामा कार्यरत कर्मचारीले परिचयपत्र देखाएर आवतजावत गर्न सक्नेछन् ।

विवाह ब्रतबन्धको हकमा भने स्वास्थ्य मापदण्ड पालना गर्ने गरी प्रशासन कार्यालयको अनुमति लिएर १५ जनासम्म सहभागी हुन पाइने आदेशमा उल्लेख छ ।

ढुवानीका साधन, बिरामी तथा कुरुवा बोकेका एम्बुलेन्स, स्वास्थ्यकर्मी र सुरक्षा निकायले प्रयोग गर्ने सवारी साधन चल्न पाउनेछन् ।

त्यस्तै एम्बुलेन्स, खानेपानी, स्वास्थ्य, खाद्यान्न, तरकारी, फलफूल, दुग्धजन्य पदार्थ, बैंक, वित्तीय संस्था दूरसञ्चार, इन्टरनेट, क्वारेन्टिन, आइसोलेसन, फोहोरमैला व्यवस्थापन लगायतका ढुवानीका साधन सञ्चालनमा कुनै रोक हुने छैन ।

सरकारी कार्यालयका गाडी सम्बन्धित विभागबाट अनुमति लिएर सञ्चालन हुन पाइने छ भने विकास निर्माण कार्यमा प्रयोग हुने जनशक्ति र सामग्री ढुवानीका गाडी चलाउने पास सम्बन्धित आयोजना वा कार्यालय प्रमुखको सिफारिसका आधारमा प्रमुख जिल्ला अधिकारीले दिने व्यवस्था मिलाइएको छ ।

यस्तै अन्तर्राष्ट्रिय उडानबाट विदेश जाने यात्रुहरूको हवाइ टिकट, पासपोर्ट, भिषा हुनेहरूलाई एयरपोर्ट जाने पाउने छन् ।

संक्रामक रोग ऐन २०२० र स्थानीय प्रशासन ऐन २०२८ अनुसार जिल्ला प्रशासन कार्यालय काठमाडौंले सबै प्रकारका सभा, सम्मेलन, गोष्ठी, भेला गर्न रोक लगाइएको छ । जारी आदेशमा सपिङ मल, सिनेमा हल, सैलुन आदि सञ्चालनमा पनि रोक लगाइएको छ ।

नेपालगन्ज : भेरी अस्पताल नेपालगन्जका आठ जना डाक्टरसहित ७३ कर्मचारीलाई कोरोना संक्रमण भएको छ। भेरी अस्पताल विकास समितिका सदस्य धनराम ओलीले १ वैशाखयता अस्पतालका ४४ महिला र २७ पुरुष कर्मचारीलाई कोरोना भएको हो।

संक्रमित हुनेमा चिकित्सक ८, नर्सिङ कर्मचारी ३३, प्यारामेडिक्स (एचए र अहेव) ८ र सहायक कर्मचारी (क्लिनर, हेल्पर) २२ र प्रशासनका २ जना छन्। संक्रमित हुने ८ डाक्टर इमरजेन्सीमा कार्यरत हुन्। इमरजेन्सीमा कार्यरत प्यारामेडिक्स ६ र ५ जना सहायक कर्मचारी रहेको ओलीले बताए।

अस्पतालका सूचना अधिकारी डा.संकेत रिसालका अनुसार एक सातायता धेरै जना कर्मचारीमा कोरोना पुष्टि भएको हो। संक्रमित हुनेमा इमरजेन्सीबाहेक अप्रेशन थिएटर, आइसीयूमा कार्यरत स्वास्थ्यकर्मी छन्।
‘१ वैशाखमा इमरजेन्सीका अहेवलाई कोरोना भएपछि कन्ट्याक्ट टे«सिङका आधारमा परीक्षण गर्दा अन्य कर्मचारीमा पनि कोरोना पुष्टि भएकोे हो’, डा.रिसालले भने, ‘कोभिड वार्डमा लक्षण नभएका संक्रमित स्वास्थ्यकर्मीले काम गरिरहेका छन्। इमरजेन्सी, आइसीयू र ओटीमा काम गर्नेहरु धेरैजसो होम आइसोलेसनमा छन्।’

खोप लगाएका स्वास्थ्यकर्मीमा कोरोना संक्रमण पुष्टि भए पनि सुरुमा सामान्य ज्वरो आउने र टाउको दुख्ने समस्याबाहेक समस्या नदेखिएको डा.रिसालले बताए। कोभिड वार्डमा एउटा सिफ्टमा २ डाक्टर र ३ जना नर्सले काम गरिरहेका छन्। प्रि–कोभिड वार्डमा एक जना डाक्टर र २ जना नर्स काम गर्छन्।

जिल्ला कोभिड–१९ संकट व्यवस्थापन केन्द्रका कोरोना सम्पर्क व्यक्ति तेज वलीका अनुसार बुधबार साँझसम्म भेरी अस्पतालमा नेपालगन्ज १७ की ३९ वर्षीया महिला, नेपालगन्ज १२ का ६५ वर्षका पुरुष र बैजनाथ गाउँपालिका का २ जना र नेपालगन्ज मेडिकल कलेज शिक्षण अस्पताल कोहलपुरमा बैजनाथ गाउँपालिका ६ का ५६ वर्षका पुरुषको निधन भएको छ। योसँगै बाँकेमा कोरोनाबाट मृत्यु हुनेको संख्या १०० पुगेको छ। उपचार गराइरहेकामध्ये एक सयभन्दा बढी सिकिस्त संक्रमित छन्।

रुपन्देही देवदह-६ का वडा अध्यक्षले उपचार अभावमा श्रीमतीलाई गुमाएका छन् । वडा अध्यक्ष दामोदर क्षेत्रीकी श्रीमती ४९ वर्षिया कृष्ण कुमारीले उपचार नपाएर ज्यान गुमाउनु परेको हो । कोरोना संक्रमित कृष्णकुमारीले थप उपचारका लागि आइसियू बेड अभावमा मँगलबार ज्यान गुमाएकी हुन् ।

यसरी जनप्रतिनिधकै परिवारले उपचार नपाएर मृत्युवरण गर्नु पर्ने स्थितीले अवस्था थप भयावह भएको पुष्टि गरेको छ । मँगलबार विहान कृष्णकुमारीलाई स्वासप्रस्वासमा समस्या देखिएपछि स्थानीय एक मेडिकलमा उपचारका लागि पुर्याइएको थियो । उक्त मेडिकलले कोरोना संक्रमणको आसंका गरेपछि लुम्बिनी प्रादेशिक अस्पतालमा लैजान सल्लाह दियो । लुम्बिनी प्रादेशकि अस्पतालमा आइपुग्दा उनको स्वास्थ्य अवस्था थप विग्रीसकेको थियो । अक्सिजनको मात्रा घटीरहेको थियो भने स्वाब परीक्षा गर्दा कोरोना पोजेटिभ देखा पर्यो ।

कृष्णको उपचारका लागि सँगै अस्पताल पुगेका देवदह नगरपालिकाका मेयर हिराबहादुर खत्रीले घटनाको विवरण सुनाउँदै भने ‘उहाको अक्सिजनको लेभबल घड्दै गएको हुँदा आइसियू बेड चाहिने चिकित्सकहरुले सल्लाह दिए । तर, अस्पतालमा आइसियू बेड खाली नभएपछि अन्तै जोहो गर्न हामीलाई नै भनियो ।’

अन्य ठाउँमा आइसियू बेड नभएको अवस्थामा तत्कालका लागि प्रादेशिक अस्पतालकै फिबर क्लिनिकमा राखेर कृष्णाको उपचार भइरहेको थियो । मेयर खत्रीले ग्लोबल आवाजसँग कुरा गर्दै भने ‘हामीले बुटवलको तिनाउ अस्पताल, भैरहवाको भिम अस्पताल, मणिग्रामको क्रिमसन असप्ताल तथा काठमाण्डौका विभिन्न अस्पतालहरुमा समेत बुझ्दा आइसियू पाउन मुुस्किल भयो ।’ आइसियू बेडका लागि दिनभर विभिन्न अस्पताल तथा व्यक्तिहरुलाई फोन गर्दा पनि नपाएपछि हैरान भएका उनीहरुले फिबर क्लिनिकमै कृष्णालाई राखेर प्रतिक्षा गर्ने बाहेक विकल्प रहेन ।

कोरोना संक्रमण पुष्टि भएकी कृष्णलाई उच्च ज्वरो, उच्च रक्तचाप र श्वास प्रश्वासमा समस्या थियो । बिहानैदेखि बुटवलको धागो कारखानामा सञ्चालित कोरोना अस्पतालदेखि काठमाडौंको नर्भिक र ह्याम्स अस्पतालसम्म बेडको लागि कुरा उनीहरुले कतै बेड नपाएपछि फिबर क्लिनिकमै कृष्णाले परान त्यागिन । आइसियू बेड कुर्दाकुर्दै कृष्णकुमारीको दिउसो ४ बजे मृत्यु भयो ।

आफ्नै सहकर्मीले परिवार गुमाउनु पर्दाको पीडासहित मेयर खत्रीले भने ‘हल्ला गरिएको जस्तो कोरोना संक्रमण रोकथामका लागि तयारी गरिएको रहेन छ ।’ सरकारको तयारी बारे असन्तुष्टि व्यक्त गर्दै उनले भने ‘प्रदेश सरकारले एक वर्षको बीचमा एउटा बेड पनि थप्न सकेको रहने छ, आफ्नै आँखा अगाडि एक सहकर्मीको श्रीमतीले उपचार नपाएर ज्यान गुमाउनुपर्यो, सर्वसाधारण जनाको अवस्था झन कस्तो होल ?’

अस्पतालका सूचना अधिकारी डा. विष्णु गौतमले कृष्णकुमारीलाई कोरोना विशेष अस्पतालमा बेड खाली नभएकाले फिभर क्लिनिकमै राखेर उपचार गरिएको बताए । लुम्बिनी प्रदेश स्वास्थ्य निर्देशनालयको तथ्याङ्क अनुसार प्रदेशमा निजी तथा सरकारी गरी १४२ वटा आइसियू बेड रहेका छन् भने १५९ एजडियू बेड रहेका छन् । यसैगरी ७५ वटा भेन्टिलेटर रहेका छन् भने संक्रमितहरुको उपचारका लागि १९२ सामान्य बेड रहेका छन् ।

काठमाडौं : कोेरोना भाइरस संक्रमणको दोस्रो लहर तीव्र गतिमा मुलुकभर फैलिँदै गएको छ। गत साताको तुलना यो साता २ सय २८ प्रतिशतले संक्रमित बढेका छन्। जसका कारण मुलुकभरका अस्पताल भरिएका छन्।

सघन उपचार कक्ष (आईसीयू), भेन्टिलेटर र अक्सिजन अभावले समस्या झन् जटिल बन्ने विज्ञ बताउँछन्। संक्रामक रोग विशेषज्ञ डा. अर्चना श्रेष्ठले नेपालमा एक जना संक्रमितले दुई व्यक्तिलाई संक्रमण सारिरहेको बताइन्।  डा. श्रेष्ठका अनुसार संक्रमणदर हेर्ने हो भने विभिन्न मुलुकमध्ये नेपालको उच्च छ। ‘गत वर्ष भारतभन्दा नेपालमा संक्रमण एक महिना पछाडि थियो। यो वर्ष नेपालले पनि भारतको जस्तै मोड लिँदै छ’, डा. श्रेष्ठले भनिन्, ‘भारतभन्दा नेपालमा संक्रमणदर धेरै बढेको छ। पोजेटिभ दर बढ्दै जाँदा समुदायमा संक्रमण छिटो फैलिरहेको बुझ्न सकिन्छ। मृत्युको संख्या पनि बढेको छ। यही दरमा बढ्दै गए एक वर्षमा देखेको संक्रमितको संख्या अबको तीन महिनाभित्रमा नै देख्नेछौं।’

पछिल्लो २४ घण्टामा ४८ सय ९७ जनामा कोरोना पुष्टि भएको छ। स्वास्थ्य तथा जनसंख्या मन्त्रालयका सहप्रवक्ता डा. समिरकुमार अधिकारीका अनुसार पीसीआर र एन्टिजेन परीक्षणबाट यो मात्रामा संक्रमण पुष्टि भएको हो।

डा. श्रेष्ठले गम्भीर परिस्थितिमा आइपुगेका बताइन्। ‘यही गतिमा संक्रमणको दर बढ्दै गए दैनिक १ सय ५० जना संक्रमितले ज्यान गुमाउनुपर्ने हुन्छ’, उनले भनिन्। पछिल्लो चौबीस घण्टामा १० जनाको ज्यान गएको मन्त्रालयले जनाएको छ। संक्रमणदरको चेन ब्रेक गर्न निशेधाज्ञा उपयुक्त भएको डा. श्रेष्ठले बताइन्। निशेधाज्ञा उल्लंघन नगरी स्वास्थ्य मापदण्ड पालना गर्ने हो भने महामारी वेग रोक्न सकिने उनको भनाइ छ।

स्वास्थ्य सेवा विभागअन्तर्गत इपिडिमियोलोजी तथा रोग नियन्त्रण महाशाखाका निर्देशक डा. कृष्ण पौडेलका अनुसार संक्रमण अहिले गणितीय दरमा वृद्धि भइरहेकाले अस्पतालमा आईसीयूको माग बढ्दै गएको छ। संक्रमितमध्य झन्डै ८० प्रतिशतलाई सामान्य लक्षण हुने र धेरैलाई अस्पताल भर्ना हुन नपर्ने डा. पौडेलले बताए। ‘संक्रमितमध्ये करिब २० प्रतिशतलाई अस्पतालमा भर्ना भई अक्सिजन चाहिने संभावना हुन्छ’, डा. पौडेलले भने।

संक्रमणको कन्ट्याक्ट टे«सिङको टड्कारो आवश्यकता रहेको उल्लेख गर्दै डा. श्रेष्ठले सरकारको मात्र भर नपरी संक्रमित आफैंले पनि तुरुन्त खबर गरी स्व क्वारेन्टाइनमा बस्न प्रेरित गर्नुपर्ने बताइन्। अहिले गरिएको परीक्षणको दायरा विस्तार गर्नुपर्ने, स्थानीय तहले पनि परीक्षणको क्षमता वृद्धि गर्नुपर्ने डा. श्रेष्ठको सुझाव छ।

‘सबैजना जिम्मेवार बन्नुपर्ने भएको छ। जनस्वास्थ्य मापदण्डको कडाइका साथ पालना गर्नुपर्ने भएको छ। कोरोना संक्रमणको लक्षण देखिएपछि स्वाब दिन र नतिजा नआइञ्जेलसम्म भेटघाट नगरिदिनु होला। यति गरे पनि संक्रमण दर घट्न पुग्छ’, निर्देशक डा. पौडेलले भने।

मन्त्रालयका सहप्रवक्ता डा. अधिकारीका अनुसार १३ हजार ८ सय ८९ जनाको पीसीआर परीक्षण गर्दा ४ हजार ७ सय ७४ मा संक्रमण पुष्टि भएको थियो। त्यस्तै  ९ सय बढीको एन्टिजेन परीक्षण गर्दा १ सय २३ जनामा गरेर ४८ सय ९७ जनामा कोरोना पुष्टि भएको मन्त्रालयले जनाएको छ। भक्तपुरमा २ सय ३२, ललितपुरमा ३ सय ५१ र काठमाडौंमा १४ सय ६४ गरेर उपत्यकामा २ हजार ४७ जनामा संक्रमण पुष्टि भएको छ।